میرپورخاص بجلی بحران، ایم کیو ایم کے رکن قومی اسمبلی انجینئر علیم خانزادہ کا سخت نوٹس
میرپورخاص (بیوروچیف سید شاہزیب شاہ) — میرپورخاص میں جاری شدید بجلی بحران پر ایم کیو ایم کے حق پرست رکن قومی اسمبلی انجینئر علیم خانزادہ نے سخت نوٹس لیتے ہوئے حیسکو میرپورخاص کی ناقص کارکردگی پر شدید برہمی کا اظہار کیا ہے۔
تفصیلات کے مطابق، میرپورخاص میں گزشتہ 24 گھنٹوں سے غیر اعلانیہ لوڈشیڈنگ جاری ہے جس سے شہری سخت پریشان ہیں۔ کاروباری سرگرمیاں مفلوج ہوچکی ہیں اور گرمی کی شدت نے عوام کو مشکلات میں ڈال رکھا ہے۔
علیم خانزادہ کی فوری کارروائی
رکن قومی اسمبلی علیم خانزادہ نے حیسکو چیف حیدرآباد، کمشنر میرپورخاص، ڈپٹی کمشنر اور سپرنٹنڈنگ انجینئر حیسکو سے ہنگامی رابطہ کیا اور تفصیلی رپورٹ طلب کی۔ انہوں نے کہا کہ اگر کروڑوں روپے کی رقم میرپورخاص کو لوڈشیڈنگ فری بنانے پر خرچ کی گئی ہے تو اس کا حساب بھی دینا ہوگا۔
واضح ہدایات
علیم خانزادہ نے حیسکو حکام کو سختی سے ہدایت دی کہ بجلی کی ترسیل فوری بحال کی جائے، اور تمام تکنیکی مسائل کی نشاندہی کرکے ہنگامی بنیادوں پر اقدامات کیے جائیں۔ انہوں نے کہا اگر جلد بہتری نہ آئی تو قومی اسمبلی میں آواز بلند کی جائے گی۔
عوام کا ردعمل
شہریوں اور تاجروں نے ایم کیو ایم کے نمائندے کی بروقت مداخلت کو سراہا اور پیپلزپارٹی کے منتخب نمائندوں کی خاموشی پر حیرت کا اظہار کیا۔ شہریوں کو امید ہے کہ اب مسئلے کا مستقل حل سامنے آئے گا۔