مواڑہ جنجور سٹاپ پر حادثہ، نوجوانوں کا جذبۂ انسانیت قابل تحسین
پنجاب (بیوروچیف روزنامہ خوبیاں وقاص امانت) – آج بھی انسانیت زندہ ہے، اس بات کا ثبوت آج یو سی مواڑہ جنجور سٹاپ پر پیش آنے والے ایک دلخراش حادثے کے بعد مقامی نوجوانوں کے جذبے نے دیا۔
حادثے کی تفصیل
ایک اینٹوں سے بھرا ہوا ڈمپر جو دراصل جیوڑہ جا رہا تھا، غلطی سے جنجور سٹاپ روڈ پر آ نکلا اور بدقسمتی سے حادثے کا شکار ہو گیا۔ حادثے کے نتیجے میں ایک شخص زخمی ہوا جس کی حالت اب بہتر بتائی جا رہی ہے۔
نوجوانوں کی بے مثال خدمات
حادثے کے فوری بعد ریسکیو 1122 ٹیم موقع پر پہنچی، لیکن جس چیز نے سب کو حیران کیا وہ تھی مواڑہ کے مقامی نوجوانوں کی بے لوث مدد۔ ان نوجوانوں نے نہ صرف ریسکیو ٹیم کے ساتھ مل کر زخمی شخص کی مدد کی بلکہ مسلسل چار گھنٹے شدید گرمی میں پانی، فروٹ اور حوصلہ افزائی کے ذریعے متاثرہ خاندان کے ساتھ کھڑے رہے۔
انسانیت کا روشن چہرہ
ان نوجوانوں کا جذبہ قابل فخر ہے۔ ان کی خدمات نہ صرف لائق تحسین ہیں بلکہ یہ سب کے لیے ایک مثالی سبق بھی ہے کہ خدمت انسانیت کا سب سے بڑا درجہ ہے۔
"دل کی گہرائیوں سے ان تمام نوجوانوں کو سلام پیش کرتا ہوں جنہوں نے ایک زندہ دل قوم کی تصویر دنیا کے سامنے پیش کی۔" — وقاص امانت