ہیٹ ویو کے بچاؤ کے لیے راجن پور میں ضلعی سطح پر اقدامات
راجن پور (مجاہد حسین، ڈسٹرکٹ بیورو چیف) وزیراعلیٰ پنجاب مریم نواز شریف کی خصوصی ہدایت پر ڈپٹی کمشنر شفقت اللہ مشتاق کی زیر صدارت ڈسٹرکٹ ڈیزاسٹر مینجمنٹ اتھارٹی (DDMA) کا اجلاس منعقد ہوا۔
ڈپٹی کمشنر نے اجلاس سے خطاب کرتے ہوئے کہا کہ ضلع میں ہیٹ ویو کے خدشے کے پیش نظر فوری اور موثر اقدامات کیے جا رہے ہیں تاکہ عوام کو زیادہ سے زیادہ تحفظ فراہم کیا جا سکے۔
ان اقدامات میں عوامی مقامات پر ٹھنڈے پانی کی فراہمی، ہسپتالوں میں ہیٹ ویو کاؤنٹرز کا قیام، ہیٹ ویو سے متعلق آگاہی مہمات، اور غیر ضروری سفر سے اجتناب کی ہدایت شامل ہے۔
اجلاس میں ڈسٹرکٹ ایمرجنسی آفیسر ریسکیو 1122 ڈاکٹر محمد اسلم، اسسٹنٹ کمشنر جمیل احمد، محمد ضمیر، سوشل ویلفیئر کی ڈپٹی ڈائریکٹر شازیہ نواز، اور ڈسٹرکٹ ہیلتھ آفیسر ڈاکٹر غلام مرتضیٰ سمیت مختلف محکموں کے نمائندے موجود تھے۔
ڈپٹی کمشنر نے افسران کو ہدایت کی کہ وہ عوام میں آگاہی بڑھانے اور فوری اقدامات پر عملدرآمد کو یقینی بنائیں تاکہ ممکنہ نقصانات سے بچا جا سکے۔