میرپورخاص: جماعت اسلامی کی جانب سے فلسطینی عوام سے اظہارِ یکجہتی کیلئے غزہ ریلی
میرپورخاص (بیوروچیف: سید شاہزیب شاہ) — فلسطینی عوام کے ساتھ اظہارِ یکجہتی کے لیے جماعت اسلامی میرپورخاص کے زیر اہتمام ایک پُرامن اور جذباتی غزہ ریلی نکالی گئی۔
تفصیلات کے مطابق، جماعت اسلامی پاکستان کے امیر حافظ نعیم الرحمٰن کی ملک گیر اپیل پر اس ریلی کا انعقاد کیا گیا۔ ریلی میں شہریوں، طلباء، علمائے کرام، تاجر برادری اور مختلف شعبہ ہائے زندگی سے تعلق رکھنے والے افراد نے بھرپور شرکت کی۔
شرکاء نے اپنے ہاتھوں میں فلسطینی پرچم، بینرز اور پلے کارڈز اٹھا رکھے تھے جن پر "قبلہ اول کی آزادی ہمارا مشن" اور "اسرائیلی دہشتگردی بند کرو" جیسے نعرے درج تھے۔ مظاہرین وقفے وقفے سے فلسطین کے حق میں اور اسرائیلی مظالم کے خلاف پرجوش نعرے لگاتے رہے۔
ریلی کا روٹ اور عوامی جذبہ
ریلی کا آغاز جامع مسجد ریلوے اسٹیشن سے ہوا جو چارمینار چوک، مارکیٹ چوک سے ہوتی ہوئی بلدیہ کمپلیکس پر اختتام پذیر ہوئی۔
قائدین کے جذباتی خطابات
ریلی کے شرکاء سے امیر جماعت اسلامی ضلع میرپور خاص سلمان خالد، شکیل احمد فہیم، احسان الٰہی مغل، رفیق چوہان اور ظفر اقبال مجاہد سمیت دیگر قائدین نے خطاب کیا۔
مقررین نے اسرائیلی افواج کے معصوم بچوں، عورتوں اور بے گناہوں پر ہونے والے مظالم کی شدید الفاظ میں مذمت کی اور عالمی برادری، او آئی سی، اقوام متحدہ اور مسلم حکمرانوں کی مجرمانہ خاموشی پر افسوس کا اظہار کیا۔
انہوں نے مطالبہ کیا کہ فلسطینی عوام کی عملی مدد کی جائے اور اسرائیل کے خلاف عالمی سطح پر مؤثر اقدامات کیے جائیں۔
ریلی کا اختتام اور دعا
ریلی کے آخر میں فلسطینی شہداء کے لیے دعا کی گئی اور یہ عزم دہرایا گیا کہ جماعت اسلامی ہر سطح پر مظلوم فلسطینیوں کی حمایت جاری رکھے گی۔